成日聽人講紅酒都會提到單寧，到底咩係單寧？原來佢同澀味有關！
單寧係植物常見嘅物質，喺香蕉、綠茶、番石榴、柿、提子皮等等都可以搵到。紅酒嘅單寧就主要嚟自提子嘅皮，所以紅酒先會比較常見到單寧，唔用皮釀嘅白酒同氣酒就就比較少有單寧。
單寧係紅酒入面嘅澀味來源，我哋通常會話比較澀嘅紅酒係「高單寧」，而冇咩澀味嘅酒係 「低單寧」。
咁有澀味有咩好？
雖然一啲酒鬼們可能唔太中意澀味，但如果冇澀味，紅酒就會飲落同糖水差唔多，冇咗獨特嘅口感同層次，所以紅酒嘅單寧其實非常重要。
咁又點解要識分單寧高低？其實單寧高/低同配咩嘢食好有關係！
單寧高嘅酒更適合用嚟配牛肉等等高脂肪同蛋白質嘅嘢食，因為單寧可以令佢哋食落冇咁油膩，而佢油脂會令單寧飲落更順滑，不過就唔適合配甜嘢😢，兩者夾埋只會令支紅酒飲落好苦澀；相反嘅單寧低嘅酒就適合就咁飲/配一啲味道較淡嘅嘢食。
下次買酒不妨諗吓要食咩，揀返單寧合適嘅紅酒啦！🍷
題外話：傳聞單寧可以抗肺炎，雖然台灣喺2020年真係有發表一份叫「 Tannic acid suppresses SARS-CoV-2 as a dual inhibitor of the viral main protease and the cellular TMPRSS2 protease」嘅研究，但其實紅酒嘅單寧好少，就咁飲酒冇咩醫療效用㗎🙌🏻。
