咩係單寧？🍇

成日聽人講紅酒都會提到單寧，到底咩係單寧？

其實單寧係植物常見嘅物質，喺香蕉、綠茶、番石榴、柿等等都可以搵到。單寧係天然嘅防腐劑，所以單寧重嘅紅酒先會放咁耐都唔會壞。

單寧係紅酒入面嘅澀味來源，雖然唔少酒鬼可能唔太中意澀味，但如果冇澀味，紅酒就會飲落同糖水差唔多，冇咗獨特嘅口感同層次。

咁點解睇單寧重唔重咁重要？梗係唔係因為可以放耐啲啦😂！係因為單寧高低，適合配嘅嘢食都唔同。

單寧高嘅酒仲適合用嚟配牛肉等等高脂肪同蛋白質嘅嘢食，因為單寧可以令佢哋食落冇咁油膩，而佢油脂會令單寧飲落更順滑。

不過單寧就唔適合配甜嘢😢，兩者夾埋只會令油飲落好苦澀。

下次買酒不妨諗吓要食咩，揀返單寧合適嘅紅酒。🍷

 

題外話：傳聞單寧可以抗肺炎，雖然台灣喺2020年真係有發表一份叫「 Tannic acid suppresses SARS-CoV-2 as a dual inhibitor of the viral main protease and the cellular TMPRSS2 protease」嘅研究，但其實紅酒嘅單寧好少，就咁飲酒冇咩醫療效用㗎🙌🏻。